ҚАЗАҚСТАН РЕСПУБЛИКАСЫ КӨКПАР ФЕДЕРАЦИЯСЫ БАСПАСӨЗ МӘСЛИХАТЫН ӨТКІЗДІ

13 қыркүйек, «Қазмедиа» орталығында ҚР көкпар федерациясы БАҚ өкілдері үшін баспасөз мәслихатын өткізді. Шарада 5-ші дүниежүзілік көшпенділер ойындарында көкпардан Қазақстан құрамасының нәтижелі ойыны сөз болды.

Көкпардан ұлттық құрама 5-ші дүниежүзілік көшпенділер ойындарында керемет нәтиже көрсетіп, жанкүйерлердің үмітін ақтады. Ойын барысында ұлттық құраманың шеберлігі мен жігері халықаралық деңгейде жоғары бағаланып, көкпаршыларымыз ел намысын абыроймен қорғап шықты.

Ұлттық құрама бас жаттықтырушысы Ақылбай Манкеевтің айтуынша, бұл жетістікке жету оңай болмаған, бәрі тыңғылықты дайындықтың арқасында.

Ақылбай Манкеев, ҚР көкпардан ұлттық құрама бас бапкері:

- Бүгінгі жеңісті күнге жету оңайға соқпады. Спортшыларымызды әрдайым жігерлендіріп отырдым. Оқу-жаттығу жиындарында әр минутымызды бағалап өткіздік. Соның нәтижесін өздеріңіз де көріп отырсыздар

Аяз Жылқыбаев, ҚР көкпар федерациясының атқарушы директоры:

- Көкпардан ұлттық құрама 2024 жылы 6 оқу-жаттығу жиынын өткізді. Көкпаршыларымыз үшін арнайы дайындықтан өткен ең мықты 6 ат сатып алдық. Оқу-жаттығу жиынындарының 5-еуінде аттармен дайындалып, еліміздегі көкпар аттарын іріктедік. Федерация тарапынан спортшыларға барлық жағдайды жасадық деп ойлаймын.

Абылайхан Нышанбеков, көкпардан ұлттық құрама мүшесі:

- Қазақ елін айтулы додада қуанту үшін барымызды салдық. Қолымыздан келді деп ойлаймын. Финалдық ойын өте қиынға соққаны рас, бірақ, трибунадағы жанкүйерлердің арқасында есемізді жібермедік.

Еске сала кетейік, 5-ші дүниежүзілік көшпенділер ойындарында көкпардан Қазақстан ұлттық құрамасы іріктеу кезеңінде Өзбекстан құрамасын 16:0, АҚШ құрамасын 12:4, Ресейден келген көкпаршыларды 18:2 есебімен жеңген еді. Ал финалдық ойында Қырғызстанмен негізгі уақытта 4:4 есебімен тең түсіп, қосымша уақытта 5:4 есебімен жеңді. Осылайша, көкпардан ҚР ұлттық құрамасы 5-ші дүниежүзілік көшпенділер ойындарының жеңімпазы атанды.

ҚР көкпар федерациясына демеушілік білдірген «Sport qory»спортты қолдау қоры мен бас серіктес «Самұрық-Қазына» екендігін айта кеткен жөн.